– গুৱাহাটী বিশ্ববিদ্যালয়ৰ উপাচাৰ্য অধ্যাপক মহন্তই নতুন দিল্লীত কেন্দ্ৰীয় মন্ত্ৰী প্ৰধান আৰু শ্বিন্দিয়াক নিমন্ত্ৰণ জনায়
– কেন্দ্ৰীয় শিক্ষামন্ত্ৰী প্ৰধানেও শীঘ্ৰেই বিশ্ববিদ্যালয় পৰিদৰ্শনৰ আশ্বাস দিয়ে
– “বিশ্ববিদ্যালয়ৰ বাবে এইটো গৌৰৱৰ বিষয়” – উপাচাৰ্য অধ্যাপক ননী গোপাল মহন্ত
গুৱাহাটী, ৬ ফেব্ৰুৱাৰী, 
২০২৫: উত্তৰ-পূব অঞ্চল উন্নয়ন (DoNER) আৰু যোগাযোগ বিভাগৰ কেন্দ্ৰীয় মন্ত্ৰী শ্ৰী জ্যোৰ্তিআদিত্য শ্বিন্দিয়া অহা ২৫ ফেব্ৰুৱাৰী ২০২৫ তাৰিখে গুৱাহাটী বিশ্ববিদ্যালয় পৰিদৰ্শন কৰিব। এই দিনটোতে ‘অ্যাডভেন্টেজ অসম ২.০’ কাৰ্যসূচী আৰম্ভ হ’ব।
বিশ্ববিদ্যালয়ৰ উপাচাৰ্য অধ্যাপক ননী গোপাল মহন্ত নতুন দিল্লীত কেন্দ্ৰীয় শিক্ষামন্ত্ৰী শ্ৰী ধৰ্মেন্দ্ৰ প্ৰধান আৰু কেন্দ্ৰীয় মন্ত্ৰী শ্ৰী শবিন্দিয়াৰ সৈতে সাক্ষাৎ কৰি তেওঁলোকক গুৱাহাটী বিশ্ববিদ্যালয় পৰিদৰ্শনৰ নিমন্ত্ৰণ জনায়।
অধ্যাপক মহন্তই কয়, “শ্ৰী শ্বিন্দিয়াই আমাৰ নিমন্ত্ৰণ গ্ৰহণ কৰিছে আৰু ২৫ ফেব্ৰুৱাৰীত বিশ্ববিদ্যালয়লৈ আহিব, যেতিয়া ‘অ্যাডভেন্টেজ অসম ২.০’ আৰম্ভ হ’ব। আনহাতে, শ্ৰী প্ৰধান শীঘ্ৰেই বিশ্ববিদ্যালয়লৈ আহিব আৰু বাৰ্ষিক বক্তৃতা প্ৰদান কৰিব।”
উপাচাৰ্য মহন্তই লগতে কয়, “গুৱাহাটী বিশ্ববিদ্যালয়ে উত্তৰ-পূৱ ভাৰতৰ উচ্চ শিক্ষাৰ ক্ষেত্ৰত এক ঐতিহ্যমণ্ডিত স্থান দখল কৰি আছে। ইয়াৰ পৰম্পৰা বৈচিত্ৰ্যময়, জীৱন্ত আৰু অন্তৰ্ভুক্তিমূলক। আমি শ্ৰী শ্বিন্দিয়া আৰু শ্ৰী প্ৰধানক স্বাগতম জনাবলৈ উৎফুল্লিত।”
তেওঁ জনায় যে “বিশ্ববিদ্যালয়ৰ শিক্ষাৰ মানোন্নয়ন আৰু আগতীয়াকৈ দক্ষতা বৃদ্ধি কৰোৱাৰ বাবে শ্ৰী প্ৰধান বহু মূল্যবান পৰামৰ্শ আগবঢ়াইছে। তেওঁ বিশেষকৈ নতুন যুগৰ চাকৰিৰ লগত সংলগ্ন স্কিল ডেভেলপমেণ্ট কোর্সৰ প্ৰয়োজনীয়তা, উচ্চ পৰ্যায়ৰ গৱেষণাৰ বিস্তাৰ আৰু উত্তৰ-পূৱাঞ্চলৰ বাবে এক টেক-নলেজ হাব স্থাপন কৰাৰ প্ৰস্তাৱ আগবঢ়াইছে। বিশেষকৈ, বিশ্ববিদ্যালয়ৰ ইনকিউবেচন চেণ্টাৰক শক্তিশালী কৰাৰ ক্ষেত্ৰত তেওঁৰ সমৰ্থন বিশেষ উৎসাহজনক।”
বিশ্ববিদ্যালয়ৰ উপাচাৰ্যগৰাকীয়ে লগতে কয়, “শ্ৰী শ্বিন্দিয়াই ২৫ ফেব্ৰুৱাৰীত প্রধানমন্ত্রী শ্ৰী নৰেন্দ্ৰ মোদীৰ উপস্থিতিত ‘অ্যাডভেন্টেজ অসম’ত এক অধিৱেশনৰ সভাপতিত্ব কৰাৰ পিছত বিশ্ববিদ্যালয় পৰিদৰ্শন কৰিব। তেওঁ বিশ্ববিদ্যালয়ৰ স্নাতকোত্তৰ ডিগ্ৰী প্ৰদান অনুষ্ঠানত মুখ্য অতিথি হিচাপে উপস্থিত থাকিব আৰু ছাত্ৰ-শিক্ষকসকলৰ সৈতে মতবিনিময় কৰিব।”
উপাচাৰ্য মহন্তই কয়, “শ্ৰী শ্বিন্দিয়াই সদায় গুৱাহাটী বিশ্ববিদ্যালয়ৰ বিভিন্ন উদ্যোগক সমৰ্থন জনাই আহিছে আৰু বিশ্ববিদ্যালয়ৰ ভবিষ্যৎ উন্নয়নৰ ক্ষেত্ৰত তেওঁৰ আশ্বাস আমাক যথেষ্ট অনুপ্ৰাণিত কৰিছে। তেওঁৰ এই পৰিদৰ্শনে নিঃসন্দেহে বিশ্ববিদ্যালয়ৰ ছাত্ৰ-শিক্ষকসকলৰ মাজত উৎসাহৰ সৃষ্টি কৰিব।”
তেওঁ কয় যে, এই দুয়ো কেন্দ্ৰীয় মন্ত্ৰীৰ গুৱাহাটী বিশ্ববিদ্যালয় পৰিদৰ্শনে বিশ্ববিদ্যালয়ক উচ্চ শিক্ষাৰ এগৰাকী অগ্ৰণী প্ৰতিষ্ঠান হিচাপে অধিক দৃঢ়তাৰে প্ৰতিষ্ঠিত কৰিব, যি বিশ্বমানৰ শিক্ষাৰ ক্ষেত্ৰত অঙ্গীকাৰবদ্ধ।
