🛑 উইম্বলডনৰ সৈতে ভাৰতৰ সম্পৰ্ক : ভাৰতত তৈয়াৰ হয় খেলুৱৈয়ে ব্যৱহাৰ কৰা জনপ্ৰিয় টাৱেল

LIVE ASSAM: বিশ্ব কাপ ফুটবলৰ লগতে সম্প্ৰতি লণ্ডনত চলি আছে টেনিছ জগতৰ সবাতোকৈ জনপ্ৰিয় আৰু আকৰ্ষণীয় উইম্বলডন প্ৰতিযোগিতা।
. এই উইম্বলডনৰ ট্ৰফী এবাৰ হাতত তুলি ল’বলৈ সৰ্বস্ব উজাৰি দিয়ে বিশ্বৰ প্ৰায় আটাইবোৰ নামী- দামী খেলুৱৈয়ে।
. সেই উইম্বলডনৰ এক অন্যতম আকৰ্ষণ হৈছে প্ৰতিযোগী সকলে খেলৰ সময়ত ব্যৱহাৰ কৰা টাৱেলসমূহ।
বিয়ন বৰ্গৰ পৰা পীট চাম্প্ৰাছ, ছেৰেনা উইলিয়ামছৰ পৰা নাওমি ওছাকালৈ সকলোৱেই আদৰৰে ব্যৱহাৰ কৰি আহিছে এই টাৱেল।
. উইম্বলডনৰ নাম আৰু প্ৰতীক সম্বলিত এই টাৱেলসমূহ খেলুৱৈৰ লগতে কৰ্মকৰ্তা তথা দৰ্শকসকলৰ দ্বাৰাও বিশেষভাৱে সমাদৃত। খেলৰ মাজৰ জিৰণিৰ সময়ত কেতিয়াবা শৰীৰত, কেতিয়াবা মূৰত, কেতিয়াবা কান্ধত সযতনে খেলুৱৈ সকলে ব্যৱহাৰ কৰা এই টাৱেলসমূহ সদায়েই উইম্বলডনৰ এক আকৰ্ষণ ৰূপে পৰিগণিত হৈ আহিছে।
. ১৯৮৭ চনৰ পৰা এই টাৱেল বৃটেইনত তৈয়াৰ কৰি আহিছিল কৃষ্টিয়ে। কিন্তু ১৫ বছৰ পূৰ্বে ৱেলছপুন নামৰ এগৰাকী ভাৰতীয় বস্ত্ৰ উদ্যোগীয়ে ইয়াক ক্ৰয় কৰে আৰু তেতিয়াৰে পৰা ইয়াৰ উৎপাদন গুজৰাটৰ ৱাপিলৈ স্থানান্তৰিত হয়।
প্ৰাপ্ত তথ্য অনুসৰি এই টাৱেলৰ উৎপাদন প্ৰক্ৰিয়া প্ৰতিযোগিতাৰ ১৮ মাহ পূৰ্বেই আৰম্ভ কৰা হয়। প্ৰতিযোগিতাৰ সময়, পৰিৱেশ আৰু অন্যান্য উপাদানৰ সৈতে সংগতি ৰাখি ইয়াৰ ডিজাইন শৈলী নিৰ্ণয় কৰা হয়। ইয়াত ব্যৱহাৰ কৰা সূতা, ৰং আদি সদায়েই অতি উচ্চ মান বিশিষ্ট হয়।
উইম্বলডনৰ নিয়ম অনুসৰি প্ৰতিগৰাকী খেলুৱৈৰ বাবে সংৰক্ষিত লকাৰত এই টাৱেলসমূহ ৰখা হয় আৰু তাৰ পৰা নিজৰ ব্যৱহাৰৰ বাবে এই টাৱেল সংগ্ৰহ কৰে খেলুৱৈয়ে। ব্যৱহাৰৰ অন্তত খেলুৱৈ সকলে এই টাৱেলসমূহ উভতাই দিব লাগে যদিও অধিকাংশই ইয়াক এক স্মাৰক ৰূপে নিজৰ বাবে সংৰক্ষণ কৰাৰ উদ্দেশ্যে লৈ যায়।
কিন্তু বহু খেলুৱৈৰ বাবে এয়া ইমানেই লোভনীয় হয় যে নিয়মৰ বাহিৰলৈ গৈ প্ৰয়োজনতকৈ অধিক টাৱেল নিজৰ কীট বেগত ভৰাই লয়। যোৱা বছৰ পোলেণ্ডৰ ইগা শ্বুয়াটেক নামৰ খেলুৱৈ গৰাকীয়ে এইদৰে বহু সংখ্যক টাৱেল বেগত ভৰাই লৈছিল যদিও তেওঁক বাৰণ কৰা হয়। আনকি বৰ্তমানৰ শীৰ্ষ খেলুৱৈ নোভাক জোকভিছেও পৰিয়াল তথা আত্মীয়ই এই টাৱেলৰ বাবে হেঁচা প্ৰয়োগ কৰি অস্বস্তিত পেলাই বুলি স্বীকাৰ কৰিছে।
সমগ্ৰ বিশ্বৰ খেলুৱৈ তথা দৰ্শকৰ আকৰ্ষণীয় এই টাৱেল তৈয়াৰ কৰা হয় এইখন ভাৰতত।