🛑সৰ্বোচ্চ ন্যায়ালয়ত নজীৰবিহীন ঘটনা

LIVE ASSAM : ০ আদালতৰ মজিয়াত অভব্য আচৰণ

সৰ্বোচ্চ ন্যায়ালয়ৰ ইতিহাসত কাহানিও নঘটা এক অবাঞ্চিত ঘটনা সংঘটিত হ’ল যোৱা ১০ জুলাইত।
লক্ষ্ণৌৰ প্ৰৱল প্ৰতাপ নামৰ এজন লোকে দাখিল কৰা এক আবেদনৰ শুনানি গ্ৰহণ কৰিবলৈ সাজু হৈছিল সৰ্বোচ্চ ন্যায়ালয়ৰ ন্যায়াধীশ কে ভি বিশ্বনাথন আৰু আলোক আৰাধে নামৰ দুগৰাকী বিচাৰপতি। এই আবেদনত নিজৰ পক্ষ উপস্থাপন কৰিবলৈ আগুৱাই গৈছিল স্বয়ং প্ৰৱল প্ৰতাপ। এগৰাকী এডভোকেটৰ দৰেই সাজ- পাৰ পৰিধান কৰি যোৱা প্ৰৱল প্ৰতাপে আদালতত কোৱা প্ৰথম বাক্যটো আছিল – My Judicial Servant, I Order You To Order Registration Of The FIR against ACP, Vikash Nagar, Lucknow and against Duplex Technologies Services Limited.
তেওঁৰ সেই কথা শুনি বিচাৰপতিয়ে তেওঁক প্ৰশ্ন কৰে যে – আপুনি আমাক অৰ্ডাৰ দিছে নেকি?
কিন্তু প্ৰৱল প্ৰতাপে সেই প্ৰশ্নৰ উত্তৰ নিদি নিজৰ কথা শেষ কৰিয়েই লগত নিয়া কাগজসমূহ ওপৰলৈ লক্ষ্য কৰি দলিয়াই দি মুখ্য ন্যায়াধীশলৈ বুলি অশ্লীল বাক্যবাণ নিক্ষেপ কৰে।
নিৰাপত্তাৰক্ষীয়ে লগে লগেই তেওঁক গবা মাৰি ধৰে আৰু তাৰ পৰা আঁতৰাই লৈ যায়। সম্প্ৰতি দিল্লী আৰক্ষীয়ে লোকজনৰ জেৰা অব্যাহত ৰাখিছে।
এই নজীৰবিহীন ঘটনাই সৰ্বোচ্চ ন্যায়ালয়ত উপস্থিত সকলোকে হতভম্ব কৰি তোলে।